ESTATUTU DOCENTE

Confederación de Sindicatos de Trabajadores
y Trabajadoras de la Enseñanza – Intersindical
Carretas, 14-7º E-F 28012 Madrid Telf: 915322264
Fax: 915322280 stes@stes.es - www.stes.es


[Castellano]  [Català]  [Euskara]  [Galego]

[SOFITAR [VER SOFITOS]

MANIFIESTU
El profesoráu nel so llaberintu: L'Estatutu Docente

La gobalización económica, que trai vientos privatizadores pal conxuntu de los sistemes educativos del mundu, vese espeyada na Llei Orgánica d’Educación (LLOE) acabante d’aprobar pol parlamentu español. Esta llei supón un ataque escontra la Escuela Pública porque ye una norma que, arrespondiendo a les polítiques privatizadores que tienten d’implatase en tol mundu, espeya que la educación, un drechu fundamental de les persones y non una mercancía venceyada a les riegles del mercáu, ye un serviciu públicu que “pue ser emprestáu polos poderes públicos y pola iniciativa social, como garantía de los drechos fundamentales de los ciudadanos ”, cuando la verdá ye que “la iniciativa social” ye, en realidá, la empresa privada, concebida pal arrequecimientu o l’adoctrinamientu, o dambes coses a la vez.

La potenciación d’una Escuela Pública de calidá y la necesaria meyora de les condiciones de trabayu del profesoráu, fueron siempre oxetivos a algamar pa los sectores más avanzaos y progresistes del conxuntu de la comunidá educativa, porque pa que la enseñanza ameyore ye menester que’l profesoráu vea reconocíu’l so llabor y valoráu’l so trabayu. Y, de la mesma manera que la LLOE nun fortalez la Escuela Pública, tampoco s’aprovechó esta llei p’ameyorar les condiciones de trabayu del Profesoráu.

Les propuestes que dende SETES-i se presentaron nel Parlamentu p’avanzar nesi reconocimientu y meyora fueron rechazaes na so mayoría, escudándose los grupos parlamentarios que votaron favorablemente la llei y el mesmu gobiernu nel sofitu qu’afirmaben disponer de les organizaciones sindicales que roblaron col MEC un alcuerdu llaboral mentanto la tramitación parlamentaria n’ochobre del añu pasáu.

Agora, y cola disculpa de regular el desenrollu profesional del profesoráu, el gobiernu introduz al profesoráu nun llaberintu inquietante, regresivu y xerarquizador: l’Estatutu del Profesoráu. Estatutu que, de según los sos promotores quier ordenar la profesión y espeyar los drechos y deberes del profesoráu, pero lo que daveres fai ye introducir na enseñanza pública métodos empresariales de xestión de personal, mui lloñe de lo que ye y debe siguir siendo’l trabayu docente. Nesti Estatutu los plantegamientos neolliberales de dellos sectores del gobiernu y del MEC vense claramente espeyaos.

Les novedaes del estatutu básense na implantación d’una “carrera docente” que se sofita na promoción de la competitividá ente’l profesoráu: correr y competir p’aportar primero, p’algamar tal o cuál méritu, pa ser a cobrar tal o cuál retribución; y na facultá de la direición de los centros o/y de la inspeición educativa pa informar favorablemente o non de la evaluación a la qu’ha sometese tol profesoráu; si la evaluación ye “voluntaria” la carrera faise más rápido. La “carrera docente” concrétase nun nuevu plantegamientu de les actuales retribuciones complementaries, con nuevos componentes del complementu específicu, apruciendo los “graos”, que van poder algamase dempués d’una evaluación positiva del profesoráu. Ente esos nuevos componentes rescamplen el d’ “especial dedicación al centru”, que tien calter anual y nun se consolida, y la introducción de la retribución de la función tutorial, que divide al profesoráu y escaez qu’esti llabor ta venceyáu a la xera d’enseñar.

Los méritos pa reblagar na “carrera docente”, pa conseguir el grau dependen de criterios tan escuros o arbitrarios como la evaluación voluntaria de la práutica docente, l’asunción de llabores y responsabilidaes complementarios, la implicación cola meyora de los resultaos del alumnáu, a los qu’hai qu’añader “una dedicación horaria especial al centru de calter estable o servicios educativos”, ello ye, va pagase la prolongación de la xornada llaboral.
La propuesta d’Estatutu del Ministeriu tien otros aspeutos que son negativos pal desenrollu profesional del profesoráu: la redistribución de personal nel centru; la movilidá forzosa; la recolocación o impartición obligatoria de materies diferentes a la d’accesu; la falta de garantíes pa que los concursos de tresllaos seyan añales; la llibre designación pa los puestos de trabayu, n’igualdá col concursu; la falta de propuestes en salú llaboral, sin tan siquier mencionar les efermedaes profesionales...

El proyeutu d’Estatutu dexa al profesoráu interín nuna precariedá llaboral y económica permanente, con contratos añales, ensin cobrar pola antigüedá nel trabayu y, p’aumentar entá más la so discriminación, ensin poder acceder a los graos.

El llaberintu nel que’l MEC introdució al Profesoráu contién otros dos elementos que van a les clares escontra la so dignidá como trabayadores. Nun se reconoz el drechu de les persones que tienen la representación sindical a intervenir en tolo que cinca a la defensa de los drechos del profesoráu: horarios, ceses, plantilles, baremos... y la posibilidá de que’l profesoráu seya “degradáu” cola perda de los graos adquiríos, como castigu por faltes que nun se concreten, y esto dempués de poner a tol profesoráu baxo sospecha cola evaluación voluntaria.

L’Estatutu ha dignificar el llabor d’enseñar

El conxuntu del profesoráu, que nun tien ente les sos prioridaes la esistencia d’un estatutu, camienta, sicasí, necesario que l’almistración y el conxuntu de la sociedá reconozan y estimen la importancia del so trabayu, polo que’l posible estatutu ha sirvir pa dignificar el llabor d’enseñar, p’ameyorar les condiciones de trabayu del profesoráu; pa empeorar, nun queremos Estatutu.

Na negociación d’esti proyeutu STES-i esixe al Ministeriu que revise fondamente les nueves bases nes que pretende sofitar les rellaciones llaborales del Profesoráu y les sos retribuciones. El gobiernu ha asumir que la enseñanza supón de toes toes trabayar n’equipu y que debe desaniciase cualisquier niciu de competitividá ente’l profesoráu, afalando’l trabayu coleutivu y n’equipu, l'autonomía y la democratización de los centros, la suba de les plantilles, la disminución de les ratios, la constatación del llabor tutorial de tol profesoráu, una mayor capacidá de decisión de los muérganos colexaos...

Entá más y como elementu d’importancia cimera ye necesario que se regule una mesma titulación pa exercer en tola enseñanza como la vía p’algamar el Cuerpu Únicu del Profesoráu y permitir la so movilidá per tol sistema educativu. La concreción del Estatutu ha contemplar tamién la meyora de les retribuciones pal profesoráu de tol Estáu, polo que reivindicamos l’aumentu en doscientos cincuenta euros mensuales del complementu específicu, como midía d’apoyu ante la reforma educativa y pola complexidá de la tarea d’enseñar d’anguaño. Tamién reivindicamos el drechu al añu sabáticu, la reducción horaria ensin disminución salarial dende los 55 años, el retiru voluntariu a los 60 años y la permanencia nel sistema educativu del profesoráu interín hasta conseguir el so accesu definitivu al mesmu.

El procesu de tramitación del Estatutu entá va durar unos meses y mentanto los STES-i siguirán informando sobre los sos conteníos y les alternatives que defende, nes que se recueyen les reivindicaciones y valoraciones del profesoráu.

Manifestamos que queremos trabayar a comuña col restu sindicatos pa que l’Estatutu nun empeore les nuestres condiciones de trabayu. Pero pa consiguilo necesitamos conocer los puntos de vista que les distintes organizaciones caltienen sobre los aspeutos más conflictivos y pelligrosos y han facelo agora,  porque, anque’l futuru tan ensin escribir, el pasáu recién diznos qu’hai organizaciones dispuestes a firmar col gobiernu cualisquier midía namás que pa xustificar la so esistencia.

Los STES-i plantegamos al profesoráu y a tolos sindicatos que ye necesario facer tou tipu de presiones pa torgar que nos “degraden” y pa que l’Estatutu sirva de toes toes pa dignificar la enseñanza y ameyorar les condiciones llaborales de los sos trabayadores.

Cola movilización del profesoráu, como yá ficimos ante ofensives de gobiernos anteriores, los STES-i comprometémonos a emplegar toles nuestres fuerces pa parar esta intolerable agresión al profesoráu, pa salir del llaberintu: si l’Estatutu nun sirve p’ameyorar, nun queremos Estatutu.

QUE NUN TE DEGRADEN, MOVILÍZATE
STES, POLA DIGNIFICACIÓN DE LA TAREA D’ENSEÑAR
STES, POLA MEYORA DE LES CONDICIONES DE TRABAYU DEL PROFESORÁU.
CONTIGO, MEYOR

EL SECRETARIÁU DE LA CONFEDERACIÓN DE STES-INTERSINDICAL


 Esti manifiestu, xunto colos sofitos recibíos, va aprurrise-y al MEC mentanto la negociación na Mesa Seutorial del proyeutu. Tamién va apurrise-yos a los distintos Grupos Parlamentarios del Congresu y del Senáu mentanto la so tramitación parlamentaria.

[SOFITAR [VER SOFITOS]

 

© Confederación de STEs-Intersindical